काठमाडौँ, २२ असार । सेलिब्रेटीको आत्महत्या विषयलाई लिएर विश्वमै कलाकारहरुको मानसिक स्वास्थ्यको व्यापक बहस हुन थालेको छ । नेपालमा पनि यसको बहस सुरु भएको छ । बिहीबार अभिनेता सारुक ताम्राकारले घरमै झुण्डिएर आत्महत्या गरेको विषयमा अहिले फिल्म क्षेत्रमा कलाकारहरुको मानसिक स्वास्थ्यको विषयमा बहस हुन थालेको छ ।
यस विषयमा अभिनेत्री केकी अधिकारीले फिल्म निर्माणको समयमा कलाकार तथा प्राविधिकहरूका लागि मानसिक स्वास्थ्य परामर्श विभाग राख्न जरुरी भइसकेको बिचार राखेकी छन् । उनले सामाजिक संजालमा एक पोष्ट गर्दै यस्तो धारणा राखेकी हुन् ।
उनी लेख्छिन्, ‘ हामीले चलचित्र निर्माता र मिडिया उद्योगका प्रतिनिधिको रूपमा हाम्रो बजेट योजना बनाउँदा वा चलचित्र हस्ताक्षर गर्दा, निर्माणको समयमा सम्पूर्ण कलाकार तथा प्राविधिक सदस्यहरूका लागि मानसिक स्वास्थ्य परामर्शको विभाग पनि राखिन जरुरी भइसकेको छ । सार्वजनिक स्पटलाइटमा हुनुको लागत अकल्पनीय हुन सक्छ, बेलैमा सबै मिली यसलाई गम्भीरताका साथ लिऔं ।’
