काठमाडौँ, १४ असार । नेकपा एमालेको युवा दस्ता राष्ट्रिय युवा संघ नेपालद्वारा आयोजित काठमाडौँ उपत्यका स्तरिय भ्याली फुटसल च्याम्पियनसिप एक कार्यक्रमका बिच आजबाट सुरु भएको छ ।
संघका अध्यक्ष क्षितिज थेबेले एक समारोहबीच तारकेश्वर वडा नं. ६ फुटुङ स्थित फुटसल मैदानमा उद्धाटन गरेका खेलमा बोल्दै अध्यक्ष थेबेले एमालेमा नवयुवाहरुको आकर्षण बढेको बताउनु भएको छ । अध्यक्ष थेवेले राष्ट्रियताको सवालमा, आम जनताको जनजिवीकाको सवालमा, कृषक र किसानको पक्षमा, महंगी र भष्ट्रचारको विरुद्ध लगायत अनेकौ मुद्दामा राष्ट्रिय युवा संघ नेपाल र नेकपा एमालेले खेलेका गतिविधिका कारण एमाले प्रति थप आकर्षण बढेको बताउनुभयो ।
एक प्रसंगमा अध्यक्ष थेवेले वर्तमान सरकार ललिता निवास सरकारी जग्गा नभएको भनेर फैसला गराउने तत्कालीन न्यायाधीश बलराम केसि लगायतलाई पक्राउ नगरेर जोगाउन खोजिरहेको र त्यस घटनालाई युवा संघले नजिकबाट नियालिरहेको बताउनुभयो ।
प्रतियोगितामा विजेता टिमले २ लाख र उपविजेताले १ लाख नगद पुरस्कार पाउनेछन् । उत्कृष्ट एक जना खेलाडी र उत्कृष्ट एक गोल रक्षकलाई समान १०-१० हजार दिइनेछ । प्रतियोगितामा काठमाडौ, भक्तपुर र ललितपुर जिल्ला स्थित स्थानीय तहका सबै २२४ वडाका १६ देखि २४ उमेर समूहका युवाहरुको झण्डै ५०० फुटसल टिमको सहभागिता रहनेछ । उपत्यकाका २१ वटै स्थानीय तहमा आजदेखि २२ गतेसम्ममा पालिका च्याम्पियनसिपका लागि आ-आफ्नो पालिकामा वडास्तरीय च्याम्पियनसिप खेलाइनेछ र पालिका च्याम्पियनहरुका बीचमा असार २३ गते भव्य समारोह बीच फाइनल खेल हुने राष्ट्रिय युवा संघले जनाएको छ । पछिल्लो समय फुटबल र फुटसल प्रति आम युवाको बढ्दो आकर्षण र संघको रचनात्मक क्रियाकलाप गर्ने उद्देश्यले विविध रचनात्मक क्रियाकलाप गर्दै आईरहेको संघका प्रवक्ता निरोज पौडेलले जानकारी गराउनुभयो ।
