एजेन्सी, २ असार । माइक्रोसफ्ट कम्पनीका सह–संस्थापक बिल गेट्सले शुक्रबार चिनियाँ राष्ट्रपति सी जिनपिङलाई चीनमा भेटेका छन् ।
बिल गेट्सलाई ‘पुरानो साथी’ भन्दै चिनियाँ राष्ट्रपति सी जिनपिङले अमेरिका र चीन दुवैलाई फाइदा हुने गरी सहयोग गर्न सक्ने बताएका छन् । भेटवार्ता चीनको राजधानी बेइजिङको आधिकारिक दियाओयु ताई गेस्ट हाउसमा भएको थियो। राष्ट्रपति सी जिनपिङले तीन वर्षपछि बिल गेट्सलाई भेट्न पाउँदा आफू निकै खुसी भएको बताएका छन् । समाचार एजेन्सी रोयटर्सका अनुसार चिनियाँ सरकारी सञ्चारमाध्यमले उक्त भेटको भिडियो सार्वजनिक गरेको छ, जसमा राष्ट्रपति सीले अमेरिका–चीन सम्बन्धको जग दुवै देशका जनतासँग रहेको बताएका छन् । उनले भने, “वर्तमान विश्व परिस्थितिमा हामी दुवै देशका जनतालाई फाइदा हुने र सम्पूर्ण मानवताको हितमा हुने काम गर्न सक्छौँ।”
बुधबार बेइजिङ पुगेका बिल गेट्सले चिनियाँ राष्ट्रपतिसँगको भेटको यो अवसर पाउँदा आफूलाई सम्मानित भएको बताए । ‘हामीले सधैं राम्रो कुराकानी गर्यौं र आज हामीसँग छलफल गर्न धेरै महत्त्वपूर्ण विषयहरू हुनेछन्,’ उनले भने।समाचार एजेन्सी रोयटर्सका अनुसार बिल गेट्सले आफ्नो व्यक्तिगत ब्लगमा आफू र सीले स्वास्थ्य सेवा, जलवायु परिवर्तन र विकासबीचका चुनौतीहरूबारे छलफल गरेको बताएका छन्।
