काठमाडौँ, १८ जेठ । स्पेनिस क्लब सेभियाले बुधबार राति पुस्कास एरेनामा इटालियन क्लब एएस रोमालाई टाइब्रेकरमा ४–१ ले पराजित गर्दै कीर्तिमानी सातौँ पल्ट युरोपा कपको उपाधि जितेको छ । रोमाका प्रशिक्षक जोजे माउरिन्होले युरोपियन प्रतियोगिताको ६ फाइनल खेलमा पहिलोपटक पराजित भए ।
निर्धारित ९० मिनेट समयको खेल भने १–१ को बराबरीमा रहेको थियो । थपिएको ३० मिनेट समयमा पनि दुवै टिमले गोल गर्न नसकेपछि खेल पेनाल्टी सुटआउटमा गएको हो । पेनाल्टी सुटआउटमा स्पेनिस ला लिगाको क्लब सेभियाका लागि गोन्जालो मोन्टिएलले निर्णायक गोल गरे ।
यससँगै सेभियाले खेलेका सबै सात युरोपा लिगको फाइनल जित्न सफल भएको छ । पछिल्लो जितसँगै सेभियाले अर्को सिजनको च्याम्पियन्स लिगमा स्थान पक्का गरेको छ । सेभियाले यसअघि २०२०, २०१६, २०१५, २०१४, २००७ र २००६ युरोपा लिगको उपाधि जितेको थियो । सेभियापछि इन्टर मिलानले सबैभन्दा धेरै तीन पटक युरोपा लिगको उपाधि जितेको छ ।
