मकवानपुर, ११ माघ । बाग्मती प्रदेश सरकारले आज नियुक्त हुने आठ जना मन्त्रीकाे टुङ्गो लगाएकाे छ ।
नेकपा एमाले, माओवादी केन्द्र र राष्ट्रिय प्रजातन्त्र पार्टीले मन्त्रालयकाे भागबण्डा मिलाएका हुन् । एमाले सांसद एकालाल श्रेष्ठले श्रम, रोजगार तथा यातायात मन्त्रालयको जिम्मेवारी पाएका छन भने रामेश्वर श्रेष्ठले स्वास्थ्य मन्त्रालय र केशव पोख्रेलले प्रदेशको पशुपक्षी तथा कृषि मन्त्रालयको जिम्मेवारी पाएका छन ।
यसैगरी नेकपा माओवादी केन्द्रका सांसद युवराज दुलाललाई भौतिक मन्त्रालयको जिम्मेवारी दिइने भएकाे छ । माओवादीकी सांसद कुमारी मोक्तानलाई फेरि सामाजिक विकास मन्त्री बनाइएको छ भने माओवादीका गङ्गानारायण श्रेष्ठलाई आन्तरिक मामिला मन्त्रीमा नियुक्त गर्ने तयारी गरिएको छ ।
राप्रपाका उद्धव थापा खानेपानी, ऊर्जा तथा सिँचाइ मन्त्री हुनुहुने भएको छ भने पर्यटन, उद्योग तथा सहकारी मन्त्री र वन तथा वातावरण मन्त्रालय पनि राप्रपाले पाउने भएको छ । नवनियुक्त मन्त्रीहरुको सपथ आज २ बजे हुने भएको छ ।
