एजेन्सी, १४ बैशाख । सेनाले शासन गरिरहेको म्यानमारको अदालतले प्रजातन्त्रवादी नेतृ आङ सान सुकीलाई भ्रष्टाचार मुद्दामा दोषी ठहर गर्दै पाँच वर्षको सजाय सुनाएको छ ।
सन् २०२१ फेब्रुअरीमा सेनाले देशको सत्ता हातमा लिएदेखि उनी घरमा नजरबन्द छिन् । सेनाले सुकीविरुद्ध श्रृंखलावद्ध बन्द सुनुवाई गरिरहेको छ । म्यानमारको सैन्य सरकारले ७६ वर्षीया नोबेल पुरस्कार विजेता सुकीविरुद्ध कैयौं आपराधिक मुद्दा दायर गरेको छ, जुन सबैलाई सुकीले खण्डन गरेकी छन् । मानव अधिकारवादी समूहले सुकीमाथि चलाइएका अदालती कारवाहीलाई नाटकको संज्ञा दिएको छ ।
पछिल्लो पाँच वर्षको जेल सजायपछि सुकीको कुल जेल सजाय ११ वर्ष पुगेको छ । यसअघि उनलाई जुन्ता सरकारले अन्य विभिन्न मुद्दामा ६ वर्षको जेल सजाय दिएको छ । सुकीमाथि अझै १० भ्रष्टाचार मुद्दामा सुनुवाई हुनै बाँकी छ, जसमा प्रत्येक मुद्दामा अधिकतम १५ वर्षसम्म सजाय दिन सकिने व्यवस्था छ । यदि उनी सबै मुद्दामा दोषी ठहरिन भने उनलाई १९० वर्षसम्मको जेल सजाय हुनसक्छ । बीबीसी
