काठमाडौँ, ११ असार । उपप्रधान तथा गृहमन्त्री विष्णुप्रसाद पौडेलले प्रहरी प्रशासनमा सरुवा बढुवका लागि आफु कहाँ नआउन आग्रह गर्नुभएको छ ।
शुक्रबार गृहमन्त्रीको रुपमा कार्यभार सम्हालेका गृहमन्त्री पौडेलले गृह प्रशासन र प्रहरीमा कुनै हस्तक्षेप नगर्ने बताउनुभयो । नतिजाप्रति जवाफदेही भएर आफ्नो जिम्मेवारी अनुरुपको काम गर्न प्रहरी प्रशासन स्वतन्त्र रहेको बताउनुभयो । आफूलाई नतिजा चाहिने भन्दै उहाँले जवाफदेही भएर काम गर्न आग्रह गर्नुभयो । उहाँले सरुवा, बढुवा तथा थमौतीका लागि आफूकहाँ नआउन निर्देशन दिनुभयो ।
उहाँले भन्नुभयो, ‘हरेक व्यक्ति परिभाषित जिम्मेवारीप्रति जवाफदेही हुनुपर्छ । यहाँहरु आ–आफ्नो परिभाषित जिम्मेवारी सम्पादन गर्न स्वतन्त्र हुनुहुन्छ । सुरक्षा निकायका प्रमुखलाई मन्त्रीले कुनै प्रकारको हस्तक्षेप गर्दैन । साँच्चै अन्याय अनुभूत गरेर आउँछ भने त्यो उजुरी सुन्नका लागि म तयार छु । नभए प्रमोसन, थमौती, सरुवा–बढुवाका निम्ति एउटा पुलिस मकहाँ नआओस् । प्रहरी संगठनका प्रमुखका हैसियतले गर्नुपर्ने कामका निम्ति उहाँहरु स्वतन्त्र हुनुहुन्छ । मेरो जिम्मेवारी सहजीकरणको हो । हामीले गर्नुपर्ने निर्णय, निर्देशनका लागि हामी जवाफदेही÷जिम्मेवार छौं, त्यस ढंगले गर्नेछौं । त्यसबाहेकका यावत् कामहरु यहाँहरुले गर्नुपर्दछ ।’
