निर्वाचन आयोगलाई नै चुनौती दिदै अध्यक्ष यादव

काठमाडौँ, १ असार । जनता समाजवादी पार्टीको उपेन्द्र यादव पक्षले निर्वाचन आयोगको आइतबारको निर्णयविरुद्ध कानुनी र राजनीतिक लडाइँ लड्ने घोषणा गरेको छ । महन्थ ठाकुर पक्षले भने आयोग निर्णयलाई स्वागत गरेको छ ।

जसपा अध्यक्ष उपेन्द्र यादवले आयोगको निर्णयविरुद्ध अदालत जाने तयारी भएको बताए । ‘आयोगको निर्णयविरुद्ध अदालत जाने तयारी हो । यसबारेमा मंगलबार बस्ने बैठकमा छलफल हुन्छ’, उनले भने । यादव पक्षका नेता तथा जसपा कार्यकारणी समिति सदस्य रामसहाय यादवले आयोगको निर्णयविरुद्ध कानुनी र राजनीतिक लडाइँ लड्ने बताए ।

जसपाका बहुमत कार्यकारिणी समिति सदस्यको हस्ताक्षर जुटाएर बुझाउँदा पनि आयोगले सरकारको प्रभावमा परी निर्णय गरेको यादव पक्षको भनाइ छ । आयोगले आइतबार जसपाको ठाकुर र यादव दुवै पक्षले एकअर्कालाई पार्टीबाट गरेको निष्कासन खारेज गर्ने निर्णय गरेको थियो । आयोगले जसपामा दुई अध्यक्ष रहने गरी साबिककै पदाधिकारीलाई मान्यता दिएको छ ।

ठाकुर पक्षका नेताहरूले निर्वाचन आयोगको निर्णयलाई स्वागत गरेका छन् । आयोगको निर्णय सकारात्मक र स्वागतयोग्य भएको ठाकुर पक्षका नेता विमल श्रीवास्तवले बताए । ‘आयोगको निर्णयले पार्टीलाई एकजुट बनाएको छ । निर्णय स्वागत योग्य छ’, उनले भने ।

ठाकुर निकट नेता डा. सुरेन्द्र झाले जसपाका अर्का अध्यक्ष उपेन्द्र यादव पार्टीभित्र बहुमत र अल्पमतको खेलमा लागेको भन्दै आयोगको निर्णयबाट त्यस्तो खेलको अन्त्य भएको बताए । ‘अब उपेन्द्रजीले गल्ती महसुस गरी आफूलाई सच्याउनु पर्छ । त्यसपछि पार्टी एक हुन्छ’, उनले भने ।

यसैबीच यादव पक्षले जसपाबाट सरकारमा सहभागी भएका ९ जना मन्त्रीलाई सोमबार सातदिने स्पष्टीकरण सोधेको छ । यादवले सोमबार सरकारमा सहभागी शरत्सिंह भण्डारी, राजकिशोर यादव, अनिल झा, विमल श्रीवास्तव, उमाशंकर अरगरैया, इकबाल मिया, चन्दा चौधरी, रेणुका गुरुङ र चन्द्रकान्त चौधरीलाई स्पष्टीकरण सोधेका हुन् । स्पष्टीकरण चित्त बुझ्दो नभए पार्टीबाट निकाल्ने उनले जनाएका छन् ।  

यादव पक्षले यसअघि नै सरकारमा सहभागी दुई मन्त्री राजेन्द्र महतो र लक्ष्मणलाल कर्णलाई पार्टीबाट निकालेको थियो । यो समाचार नागरिक दैनिकमा छ ।

प्रतिक्रिया दिनुहोस्

संबन्धित समाचार

काठमाडौँ, १३ साउन । काठमाडौँ उपत्यकामा २४ घण्टामा ८५९ जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या

सिन्धुली, १३ साउन । राष्ट्रपति विद्यादेवी भण्डारीले समृद्ध नेपाल सुखी नेपालीको राष्ट्रिय आकाङ्क्षा पूरा गर्न पर्यटन क्षेत्रले टेवा पुर्याउने बताएकी

काठमाडौँ, १३ साउन । पछिल्लो २४ घण्टामा देशभरमा ३८४० जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका

चित्रबहादुर केसी

काठमाडौँ, १३ साउन । राष्ट्रिय जनमोर्चाका अध्यक्ष चित्रबहादुर केसीले एमसीसी र संघीयताकै रटानमात्र गर्ने हो भने सत्तारुढ गठबन्धनबाट बाहिरिने चेतावनी