काठमाडौँ, ३१ वैशाख । प्रधानमन्त्री केपी शर्मा ओलीले आजै मन्त्रिपरिषद गठन गर्नुहुने भएको छ ।
आज दिउसो २ः३० बजे राष्ट्रपति भवन शीतलनिवासमा राष्ट्रपति बिद्यादेवी भण्डारीबाट पद तथा गोपनीयताको शपथ लिएलगत्तै प्रधानमन्त्री ओलीले मन्त्रिपरिषद गठन गर्न लाग्नुभएको हो । प्रधानमन्त्रीका मुख्य सल्लाहकार बिष्णु रिमालले दिनुभएको जानकारी अनुसार शपथलगत्तै प्रधानमन्त्री ओलीले मन्त्रिपरिषद गठन गर्न आज बिहानैदेखि गृहकार्य अघि बढाउनु भएको छ ।
नेता रिमालका अनुसार प्रधानमन्त्री ओली शपथग्रहणपछि लैनचौरस्थित शहिद पार्क पुगेर शहिदहरुप्रति श्रद्धाञ्जली अर्पण गरी सिंहदरवारस्थित कार्यकक्ष पुगेर पदबहाली गर्नुहुनेछ । प्रधानमन्त्री तथा मन्त्रिपरिषदको कार्यालयमा पदबहालीपछि प्रधानमन्त्री ओलीले गोदावरी सिटी हलको भर्चुअल माध्यमबाट उदघाटन गर्ने कार्यक्रम रहेको छ ।