काठमाडौँ, २८ चैत । विभागीय टोली एपीएफले पहिलो संस्करणको ललितपुर मेयर कप महिला टी–ट्वान्टी क्रिकेट प्रतियोगिताको उपाधि जितेको छ ।
अन्तर्राष्ट्रिय क्रिकेट मैदानमा आज भएको फाइनल खेलमा सुदूरपश्चिम प्रदेशलाई ८ विकेटले हराउँदै एपीएफ च्याम्पिएन बनेको हो । सुदूरपश्चिम प्रदेशले दिएको १०७ रनको लक्ष्य एपीएफले १६ ओभर २ बलमा २ विकेट गुमाएर पूरा गर्यो ।
एपीएफका लागि ज्योति पाण्डेले ३६ रन बनाइन् । कप्तान सीता रानामगरले २७ रन जोड्दा इन्दु बर्माले १९ रनको योगदान गरिन् । त्यसअघि, टस जितेर ब्याटिङ रोजेको सुदूरपश्चिमले २० ओभरमा ७ विकेट गुमाउँदै १०६ रन बनाएको थियो ।
जितसँगै एपीएफले नगद तीन लाख रुपैयाँ प्राप्त गरेको छ । उपविजेता सुदूरपश्चिमले एक लाख ५० हजार पायो ।
