भक्तपुर, १४ फागुन । सुर्यविनायक नगरपालिकाको उत्कृष्ट सामुदायीक विद्यालय महेन्द्र शान्ति मावि बालकोटलाई नेपाल टेलिकमले कार्यालय फर्निचर उपहार दिएको छ । महेन्द्र शान्तिमा अध्ययन गरेका पुर्व विद्यार्थीहरुको समाजको अगुवाईमा विद्यालयलाई ति फर्निचर उपहार दिईएको हो ।
उपहार दिइएका फर्निचरहरुमा ३ थान स्टिल दराज, ५ थान अफिस टेबुल, १५ थान कुर्सीका साथै शिक्षक र विद्यार्थीको सिकाईको लागि नेपाल टेलिकमको निःशुल्क सियुजी मोवाइल सिम र एकथान मोवाइल रिचार्ज स्टेशन समेत छ । टेलिकमको सियुजी सिम भने केही दिनभित्रै विद्यालयमा पठाईदिने नेपाल टेलिकमका प्रवन्धक सरोज शाक्यले बताउनुभयो ।
विद्यालय व्यवस्थापन समितिका अध्यक्ष एवम् सुर्यविनायक नगरपालिका वडा नं २ का अध्यक्ष कमलनाथ आचार्यको उपस्थितिमा नेपाल टेलिकमका प्रवन्धक शाक्यले ती फर्निचर विद्यालयमा विहीबार आयोजित एक समारोहमा विद्यालयका प्रधानाध्यापक गोपाल विक्रम थापालाई हस्तान्तरण गर्नुभयो ।
कार्यक्रममा विद्यालय व्यवस्थापन समितिका निवर्तमान अध्यक्ष हेमन्तकुमार कार्की, एवम् पुर्व अध्यक्षहरु रोहित बहादुर राना क्षेत्री र भोला सिंह सिलवाल तथा महेन्द्र शान्ति पुर्व विद्यार्थी समाजका अध्यक्ष बाबुराजा महर्जनका साथै विद्यालय व्यवस्थापन समितिका सदस्यहरुको सहभागिता थियो ।
हस्तान्तरण समारोहमा प्रधानाध्यापक थापाले विद्यालयको वर्तमान शैक्षिक अवस्थाबारे प्रकाश पार्नुभयो भने व्यवस्थापन समितिका अध्यक्ष एवम् वडाध्यक्ष आचार्यले सहयोगी दातालाई धन्यवाद दिनुभयो । पुर्व विद्यार्थी समाजका अध्यक्ष महर्जन तथा नेपाल टेलिकमका प्रवन्धक शाक्यले विद्यालयको प्रगतीको प्रशंसा गर्दै भविष्यमा पनि यस्ता सहयोगले निरन्तरता पाउने प्रतिवद्धता व्यक्त गर्नुभयो । विद्यालयका सह—प्रधानाध्यापक रामचन्द्र भट्टराई तथा टेलिकमका सरोज कुमार ढुंगानाले पनि बोल्नुभएको थियो ।
