काठमाडौँ, ९ फागुन । काव्य स्कुल नयाँबानेश्वर तथा निकेल्स फर नेपाल अमेरिकाको सहयोगमा विष्णु बाँस्कोटा फाउण्डेशनले चित्तताल, दोर्पा खोटाङ्गस्थित विद्योदय आधारभूत विद्यालयलाई शैक्षिक तथा खेलकूद सामग्री सहयोग गरेको छ ।
गतवर्षदेखि नै उक्त विद्यालयलाई शैक्षिक सामग्रीको साथै विद्यालयको खानेपानीदेखि भौतिक पुर्वाधार निर्माणको लागि सहयोग गर्दै आएको फाउण्डेशनले कोरोनाको महामारी विचमा पनि सहयोग उपलव्ध गराएको फाउण्डेशनका संस्थापक अध्यक्ष नवराज बाँस्कोटाले बताउनुभयो ।
विद्योदय आधारभूत विद्यालयका प्रतिनिधि दिलिप राईलाई फाउण्डेशनका संस्थापक अध्यक्ष एवम् काव्य स्कुलका संस्थापक प्रिन्सिपल नवराज बाँस्कोटाले ती शैक्षिक तथा खेलकूद सामग्री हस्तान्तरण गर्नुभएको थियो ।
फाउण्डेशनले काव्य स्कुल नयाँबानेश्वर तथा निकेल्स फर नेपालको सहयोगमा जनजागृति आधारभूत स्कुल तारुका नुवाकोटलाई विगत १० वर्षदेखि शैक्षिक सामग्रीको साथै विद्यार्थीहरुलाई विद्यालय पोशाक समेत उपलव्ध गराउँदै आएको छ भने विपन्न तथा जेहेन्दार विद्यार्थीलाई निशुल्क अध्यापन गराउँदै आएको छ ।
फाउण्डेशनले यो वर्षदेखि अन्य सामुदायीक विद्यालयलाई पनि शैक्षिक सहयोग गर्ने फाउण्डेशनका अध्यक्ष बाँस्कोटाले बताउनुभयो ।
