काठमाडौँ, २९ जेठ । सरकारले विदेशमा रोजगारी गुमाएर स्वदेश फर्किन चाहनेलाई आउन दिने निर्णयसँगै नेपालमा क्वारेन्टिनमा बस्नको लागि होटलहरु समेत तयार गरिएका छन् ।
सरकारले ‘पेड–क्वारेन्टाइन’ स्वरुप होटलमा बस्ने व्यवस्था गरेको हो । यसका लागि होटल एशोसिएसन अफ नेपालसँगको सहकार्यमा जिल्ला प्रशासन कार्यालय काठमाडौंले ४७ वटा होटलको सूची सार्वजनिक गरिसकेको छ ।
जसअनुसार ३ वटा चारतारे, ९ वटा तीनतारे, दुईवटा दुईतार, एउटा एकतारे डिलक्स होटल, ५ वटा एकतारे र २७ वटा पर्यटक स्तरका होटलहरु छन् । एउटा होटल पर्यटक स्तरको भए पनि चारतारे होटलको सुविधा समेत उपलब्ध गराउने व्यवस्था गरेको छ ।
सरकारले विदेशबाट आएका नागरिकलाई आफ्नै जहाज खर्च र आफ्नै क्वारेनिटन खर्चमा ‘उद्दार’ गर्न लागेको हो । तर त्यसरी तिरेर बस्न नसक्ने तर स्वदेश फर्किन चाहनेलाई जहाज खर्च तिराएर साधारण क्वारेन्टिनमा राख्नसक्ने व्यवस्था समेत गरिएको छ ।
