काठमाडौँ, २३ जेठ । ब्राजिलमा काेराेना संक्रमित संख्या ६ लाख नाघेकाे छ भने एकै दिन करिब १५ सयकाे ज्यान गएकाे छ ।
बिहीबार ब्राजिलमा एकै दिन ३१ हजार ८९० जनामा संक्रमण पुष्टि भएकाे छ भने काेराेना भाइरसकै कारण बिहीबार एक दिनमा १ हजार ४९२ जनाकाे ज्यान गएकाे छ । अहिले ब्राजिल दैनिक नयाँ संक्रमित थपिनेमा मात्र नभएर दैनिक मृत्यु संख्यामा पनि विश्वकै पहिलाे स्थानमा देखिएकाे छ ।
कुल कोरोना संक्रमित देशको लहरमा दोस्रो स्थानमा रहेको ब्राजिलमा शुक्रबार बिहानसम्म जम्मा संक्रमित संख्या ६ लाख १५ हजार ८७० पुगेकाे छ । त्यहाँ अहिलेसम्म काेराेनाबाट मृत्यु हुनेकाे संख्या ३४ हजार ४९ पुगेकाे छ । मृत्युका हिसाबले अहिले ब्राजिल विश्वकै तेस्राे लहरमा छ ।
यद्यपि ब्राजिलमा कुल संक्रमितमध्ये २ लाख ७४ हजारभन्दा बढी मानिसचाहिँ निको भइसकेका छन् । त्यहाँ हाल ३ लाख ६ हजारभन्दा बढी मानिसमा कोरोना भाइरस सक्रिय छ । ब्राजिलमा निकाे हुने दर अमेरिकाकाे भन्दा बढी छ ।
उता विश्वमा सबैभन्दा बढी कोरोना संक्रमण र मृत्युका केसहरु रहेकाे अमेरिकामा दैनिक मृतक संख्या अहिले पनि १ हजार हाराहारी नै छ । बिहीबार त्यहाँ भाइरस संक्रमणका कारण १ हजार ३१ जनाकाे मृत्यु भएकाे छ भने २२ हजार २८८ नयाँ संक्रमित थपिएका छन् । यससँगै अमेरिकामा कुल संक्रमित संख्या १९ लाख २४ हजार नाघेकाे छ ।
