काठमाडौँ, २३ फागुन । नेपालमा कोरोना भाइरस भित्रने आशंका रहेका बेला सरकारले शिक्षण संस्था बन्द गर्ने कि यहीं अवस्थामा सञ्चालन गर्ने भन्ने विषयमा निर्णय गर्नसकेको छैन् ।
शिक्षा, विज्ञान तथा प्रविधि मन्त्रालयले बिहीबार आयोजना गरेको बैठकमा निजी विद्यालयका संगठन एनप्याब्सन र अभिभावक महासंघले तत्कालका लागि विद्यालय बन्द गरेर केही दिनपछि परीक्षा सञ्चालन गर्न आग्रह गरेको थियो । प्याब्सनले ५ गतेसम्म परीक्षाको कार्यक्रम सकेर विद्यालय बन्द गर्न सक्ने धारणा राखेको थियो ।
शिक्षामन्त्री गिरिराजमणि पोखरेलले बोलाएको बैठकमा एनप्याब्सनका अध्यक्ष ऋतुराज सापकोटाले करिब १५ दिनसम्म विद्यालय बन्द गर्न सुझाव दिएका थिए ।
उनले गम्भीर समस्या आउनुभन्दा केही दिन अगावै विद्यालय बन्द गर्नु उचित हुने बताउँदै विश्वभर संक्रमण फैलिएर शिक्षण संस्था बन्द गरेको अवस्थामा हामीले परीक्षाका लागि भन्दै खोल्नुको केही औचित्य नभएको बताए ।
तर प्याब्सनले चैत ५ गतेसम्म परीक्षा सञ्चालन गरेपछि केही दिनका लागि विद्यालय बन्द गर्न सुझाव दिएको थियो । प्याब्सन अध्यक्ष टीका पुरीले विद्यालयमा उच्च सतर्कता अपनाउनु बेस हुने भन्दै तत्काल आत्तिनुपर्ने अवस्था नरहेको उल्लेख गरे । यो समाचार आजको नेपाल समाचारपत्र मा छ ।
