ललितपुर, २० फागुन । पवन प्रकृति स्कुल इमाडोल अन्तर्गतको पवन स्काउट ट्रुपमा आवद्ध स्काउटहरुका लागि विना भाडा खाना पकाउने प्रतियोगिता आयोजना गरिएको छ ।
विद्यालय प्रांगणमा आयोजित उक्त प्रतियोगितामा स्काउटहरुले रोटी पकाउनुका साथै अण्डाको अम्लेट र गोलभेडाको अचार बनाएका थिए ।
प्रतियोगिताको लागि ८ वटा स्काउटको समूहलाई २ सय ग्रामको दरले पिठो र ४५ मिनेटको समय दिइएको थियो । अरु सामाग्री स्काउट विद्यार्थी आफैंले जुटाएका थिए भने उनीहरुले दाउरा बालेर इँटामा रोटी पकाएका थिए ।
स्काउटलाई जस्तोसुकै अभावको परिस्थितिमा पनि भोकै वस्न नपरोस र पकाउने भाँडाकुडा नहुँदा पनि खाना पकाउन सकुन भनेर विना भाडा खाना पकाउन सिकाए अनुसार सो प्रतिष्पर्धाको आयोजना गरिएको स्काउट गुरु भक्तपुर जिल्ला स्काउटका समन्वय आयुक्त शीवकुमार त्वायनाले बताए । कुकिङ्ग प्रतिष्पर्धाको पत्रकार एव्म स्काउट गुरु बलराम प्यासीले मुल्यांकन गरेका थिए । जसअनुसार कोइली समूह विजयी भएको थियो ।
प्रतिष्पर्धामा विजयी स्काउटलाई विशेष समारोहमा पुरस्कार दिनुको साथै सहभागी सबैलाई कुकिङ्ग व्यायज दिइने विद्यालयका भाइस प्रिन्सिपल विष्णुभक्त राईले बताए ।
