काठमाडौँ, २९ माघ । आईसीसी विश्वकप लिग-२ एकदिवसीय क्रिकेट सिरिज अन्तर्गतको अन्तिम खेलमा सन्दिप लामिछाने ‘प्लेयर अफ दि म्याच’ बनेका छन् ।
कीर्तिपुरस्थित त्रिवि क्रिकेट मैदानमा आज बिहान भएको खेलमा नेपालले अमेरिकालाई ८ विकेटले पराजित गर्दै शानदार जित हासिल गरेको छ । नेपालको लागि पूर्व कप्तान पारस खड्काले १२ बलमा ३ छक्का र एक चौका प्रहार गर्दै २० बनाए । दिपेन्द्र सिंह ऐरीले ११ बलमा २ चौका र एक छक्का प्रहार गर्दै १५ रन जोड्न सफल भए । ज्ञानेन्द्र मल्ल १ र सुवास खकुरेल शून्यमा आउट भए ।
लेग स्पिनर लामिछानेले ६ ओभरमा १६ रन खर्चेर ६ विकेट लिएका थिए । योसँगै सन्दीप ‘प्लेयर अफ दि म्याच’ चुनिए । सन्दिप, नेपालबाट ओडीआईमा ६ विकेट लिने पहिलो खेलाडी समेत बने ।
