काठमाडौँ, २७ माघ । नेपाल पुलिस स्कूल, सामाखुसीमा कक्षा १० मा अध्ययनरत विद्यार्थीहरुले डाउन सिन्ड्रोम समाज, नेपाल, कपुरधारा काठमाडौँलाई ६ हजार ६ सय ६६ रुपैयाँ नगद र दशहजार रुपैयाँ बराबरको खाजा सहयोग गरेका छन् ।
डाउन सिन्ड्रोम तथा बौद्धिक अपाङ्गता भएका विद्यार्थीहरुको लागि काम गर्ने उक्त संस्थालाई केही सहयोग गर्ने उद्देश्यले विद्यालयका संयोजक नवराज ज्ञवालीको नेतृत्वमा ६१ जना विद्यार्थी टोली त्यहाँ पुगेको थियो । संस्थालाई सहयोग गर्ने र संस्थाको बारेमा जानकारी लिने उद्धेश्यले त्यहाँ गएको कुरा कक्षा १० का विद्यार्थी प्रतिनिधि विकास खड्काले बताए ।
उक्त संस्थाकी अध्यक्ष शिला थापालाई सो रकम तथा खाजा हस्तान्तरण गरिएको थिए भने उक्त रकम कक्षा १० का विद्यार्थीहरुले आफ्नो खाजा खर्चबाट कटौती गरेर उठाएको कुरा संयोजक ज्ञवालीले थपे ।
उक्त कार्यक्रममा पुलिस स्कूलका विद्यार्थीहरु डाउन सिन्ड्रोम तथा अपाङ्गता भएका विद्यार्थीहरुको बारेमा बुझी उनीहरुसँग नृत्य पनि गरेका थिए । पुलिस स्कूलका विद्यार्थीहरुले सामाजिक उत्तरदायित्व निर्वाह गर्ने सिलसिलामा विगतदेखिनै यसरी सहयोग गर्दै आएको कुरा विद्यालयका समादेशक, प्रहरी निरीक्षक लक्ष्मी भण्डारीले बताए ।
उक्त संस्थामा विभिन्न उमेर समूहका २८ जना विद्यार्थी रहेका छन् । उक्त संस्थाले तिनीहरुलाई जीवन जिउन सहज बनाउने उद्देश्यले विभिन्न सिपमूलक व्यवहार सिकाउँदै आएको कुरा उक्त संस्थाकी अध्यक्ष शिला थापाले बताइन् ।
