काभ्रे, २६ असोज । काभ्रेमा गाडी दुर्घटनामा परी मृत्यु भएका व्यक्तिको परिवारलाई पाँच लाख क्षतिपूर्ति दिने सहमति भएको छ ।
असोज २४ गते रोशी गाउँपालिका–३ साँझाकोटमा दशैँ मनाएर बनेपातर्फ आउँदै गर्दा दुर्घटनामा परी दुई जनाको मृत्यु भएको थियो ।
प्रहरीका अनुसार मृतक दुई जनाको परिवारलाई क्षतिपूर्तिबापत पाँचरपाँच लाख रुपैयाँ उपलब्ध गराउने, किरिया खर्चबापत पचासरपचास हजार दिने र घाइतेको उपचार गरिदिने गाडी धनी सुनिल थापा तथा मृतकका आफन्तबीच आइतबार सहमति भएको छ ।
मृतकका परिवारलाई पाँच लाख रुपैयाँ दिने सहमति भएपछि परीक्षणपश्चात् आफन्तले शव जिम्मा लिएका छन् । किरिया खर्चबापतको पचासरपचास हजार रकम आज नै उपलब्ध गराइसकेको र क्षतिपूर्ति रकम १५ दिन भित्रमा दिने सहमति भएको प्रहरीले जनाएको छ ।
सो घटनामा परी सोही गाउँपालिकाको वडा नं २ अमलवासका वकिल बोम्जन र सोही ठाउँ घर भई हाल ललितपुर जिल्ला गोदावरी नगरपालिका बस्ने प्रकाश मोक्तानको मृत्यु भएको थियो ।
उक्त घटनामा परी ३२ जना घाइते भएका र उनीहरुमध्ये केहीको उपचार भइरहेको तथा केही उपचारपश्चात् घर फर्किसकेको प्रहरीले जनाएको छ ।
