काठमाडौँ, २५ भदौ । नेपाल कम्युनिस्ट पार्टी (नेकपा) को सचिवालय बैठक सम्पन्न भएको छ ।
आज प्रधानमन्त्री निवास बालुवाटारमा बसेको बैठकमा आगामी मंसिरमा हुन लागेको उपनिर्वाचनका लागि पुनः दल दर्ताको जिम्मा महासचिव विष्णु पौडेललाई दिने निर्णयसहित बैठक सम्पन्न भएको हो ।
उक्त बैठकपछि प्रवक्ता नारायणकाजी श्रेष्ठले पत्रकारहरुसँग कुरा गर्दै भने, ‘निकट भविष्यमा हुन गइरहेको उपनिर्वाचनका निम्ति पुनः दल दर्ता गर्नुपर्ने संवैधानिक व्यवस्था र निर्वाचन आयोगको सूचनाका आधारमा दल दर्ताका सम्पूर्ण प्रक्रिया पूरा महासचिव कमरेड विष्णु पौडेललाई दिइने निर्णय गरियो ।’
निर्वाचन आयोगले उपनिर्वाचनका लागि दल दर्ताका लागि आह्वान गरेको छ । २०७४ सालमा निर्वाचन हुँदा बेग्लाबेग्लै दल रहेकोले नेकपा उपनिर्वाचनका लागि दर्ता गर्नुपरेको हो ।