ललितपुर, २४ भदौ । २०७५ सालको माद्यमिक शिक्षा परिक्षा एसईईको परिक्षाफल अनुसार गोदावरी नगरपालिकाभरिमै अमर कान्ति सेकेण्डरी इंगलिस स्कुल लेले संस्थागत विद्यालयतर्फ प्रथम भएको छ भने सो विद्यालयकी १४ वर्षिया मेधावी छात्रा दिलासा महत नगरपालिकाभरिकै उत्कृष्ट छात्रामा दरिएकी छिन् ।
छात्रा महतले सबैभन्दा बढी अर्थात ३ दशमलव ९५ जिपिए ल्याएर नगरपालिकाभरिकै उत्कृष्ट छात्रा बन्न सफल भएकी हुन । संस्थागत विद्यालयतर्फबाट नगरभरिकै उत्कृष्ट छात्रा महतलाई ललितपुर क्षेत्र नं.१ बाट संघीय संसदमा विजयी सांसद नवराज सिलवाल, ३ नं प्रदेश सभाका सांसद चेतनाथ सञ्जेल र गोदावरी नगरपालिकाका नगर प्रमुख गजेन्द्र महर्जनले पाँचहजार नगद पुरस्कार सहित प्रशंसापत्रद्वारा सम्मान गरेका छन् ।
४० औं राष्ट्रिय शिक्षा दिवस तथा ५३ औं अन्तर्राष्ट्रिय साक्षरता दिवसको अवसरमा गोदावरी नगरपालिकाद्वारा आयोजित शैक्षिक सम्मान कार्यक्रममा छात्रा महत र अमर कान्ति सेकेण्डरी इंगलिस स्कुललाई पुरस्कृत गरिएको हो ।
२०५२ सालमा स्थापना भएको सो विद्यालय २०७४ सालको माद्यमिक शिक्षा परिक्षाको परिक्षाफलमा पनि ३ दशमलव ९५ जिपिए अंकका साथ गोदावरी नगरभरिकै उत्कृष्ट विद्यालयको रुपमा पुरस्कृत भएको थियो ।
