ललितपुर, ११ भदौ । ललितपुर महानगरपालिका ९ च्यासलस्थित श्रमिक शान्ति माविमा एलकेजी, युकेजी र १ कक्षामा पढ्ने १ सय १० जना साना विद्यार्थीलाई विद्यालयमै मासुभात खुवाईएको छ । सो विद्यालय ललितपुर महानगरभित्रकै उत्कृष्ट सामुदायीक विद्यालयको रुपमा परिचित छ ।
हाई होप संस्था च्यासल, ललितपुरद्वारा ‘कुक फर किड्स’ कार्यक्रम मार्फत उनीहरुलाई मासुभात खुवाइएको हो । विद्यालय हातामा खाना पकाउँदा अरु कक्षाका विद्यार्थीको पढाईमा अवरोध पुग्ने भएकोले विद्यालय नजिकै रहेको गुठीघरमा पकाएर ल्याएको मासुभात ती साना विद्यार्थीलाई उनीहरुकै कक्षाकोठामा खान दिइएको थियो । खाजाको रुपमा मासुभात नै खान पाएपछि ती विद्यार्थीहरु दंग देखिन्थे ।
यसका लागि हाइ होप संस्थाका सहयोगी किशलाल व्यञ्जनकारको साथै संस्थाका पदाधिकारीहरु रमेश व्यञ्जनकार, किरण व्यञ्जनकार, क्रिश व्यञ्जनकार, बिकेश व्यञ्जनकार, रितेश व्यञ्जनकार, सन्देश व्यञ्जनकार, अनुज व्यञ्जनकार, मिलन देवकोटा, सनोज व्यञ्जनकार र अञ्जु गुरुङ्ग लगायत खटिएका थिए ।
एलकेजी, युकेजी र १ कक्षाका विद्यार्थीलाई पहिलोपटक हाई होप संस्थाले एकदिन मासुभात खुवाएको बताउँदै नर्सरीमा पढ्ने २५ जना विद्यार्थीलाई भने विद्यालयले नीजि स्रोतबाट दैनिक १५ रुपैयाँ खर्चेर खाजा खुवाउँदै आएको विद्यालयका प्रधानाध्यापक सानुलाल व्यञ्जनकारले बताए ।
