भक्तपुर, ८ असार । रगत कसरी बन्छ, हाम्रो शरीरमा रगतको महत्व के छ, रगत आवश्यक पर्दा कसरी शरीरमा हालिन्छ र रगत कसरी दान गरिन्छ ? यस्तै यस्तै कुराहरु सिकाउन भक्तपुर युरो किड्स सल्लाघारीका साना केटाकेटीलाई भक्तपुर दुधपाटीस्थित रक्तसञ्चार केन्द्र (ब्लड बैंक) को अवलोकन भ्रमण गराइएको छ ।
विद्यालयकी शैक्षिक संयोजक सुमिता श्रेष्ठको नेतृत्वमा युरो किड्सका १,२ र ३ कक्षाका विद्यार्थी रक्तसञ्चार केन्द्रको अवलोकन भ्रमणमा गएका थिए । उनीहरुका साथमा शिक्षिकाहरु रविना कर्ण, पुजा थापा, सजिना तामांग र सञ्जिता पोखरेल पनि थिए ।
उनीहरुलाई भक्तपुर रक्तसञ्चार केन्द्रका कर्मचारी तथा प्राविधिकहरुले शरीरमा महत्वपूर्ण भूमिका निभाउने रगतको विविध पक्षबारे जानकारी गराएका थिए ।
शिक्षिका कर्माचार्य पुरस्कृत
यसैबीच सो विद्यालयकी युरो सिनियरतर्फकी शिक्षिका श्रीदेवी कर्माचार्यलाई गत मे महिनासम्मको समग्र कामको मुल्यांकन गर्दै ‘पफर्मेन्स अफ द मन्थ’ को पुरस्कार प्रदान गरिएको छ । भक्तपुर युरो किड्स प्रालिका सञ्चालक अध्यक्ष सुनेत्र प्रधानाङ्गले आफ्नो काम अत्यन्तै जिम्मेवारीपूर्वक निभाएको भन्दै शिक्षिका कर्माचार्यलाई सो पुरस्कार प्रदान गरे ।
अन्तर्राष्ट्रिय फ्रेन्चाइज शैक्षिक संस्था युरो किड्स इन्टरनेशनलबाट गत मंसीरमा उदाउँदो केन्द्र (एमरजिंग सेन्टर) को रुपमा भक्तपुर युरो किड्स सल्लाघारी पुरस्कृत भएको थियो ।
