काठमाडौँ, २६ बैशाख । पछिल्लो समयमा विद्यालयबाट घर पुग्ने वितिक्कै विद्यार्थीहरु गृहकार्यलाई थाँती राखेर सामाजिक सञ्जालमा अल्झिन थालेपछि नयाँबानेश्वरको नेपाल विद्यापीठले आफ्ना विद्यार्थीलाई सामाजिक सञ्जालबाट हुने फाइदा र बेफाइदाका बारेमा प्रहरीमार्फत प्रशिक्षण दिएको छ ।
गत शैक्षिक सत्रमा सो विद्यालयमा गठन गरिएको प्रहरी विद्यालय समन्वय समितिमार्फत कक्षा ६ देखि १० सम्मका विद्यार्थीलाई सामाजिक सञ्जालको दुरुपयोगबाट बढ्दै गरेका साइबर अपराधको बारेमा समयमै सचेत रहन आग्रह गरिएको विद्यालयका प्रिन्सिपल विनोद तिल्सिनाले बताए ।
सामुदायीक प्रहरी सेवा केन्द्र १० को पहलमा आयोजित सो प्रशिक्षण कार्यक्रममा प्र.ह ताराराम दयालले कार्यक्रमको महत्वबारे प्रकाश पारेका थिए भने महानगरीय प्रहरी वृत्त नयाँबानेश्वरकी प्रहरी निरीक्षक संगिता श्रेष्ठले विद्यार्थीलाई साइबर अपराधबाट जोगिन र लागुपदार्थ दुव्र्यसनबाट टाढा बस्न समेत आग्रह गरेकी थिइन ।
