काठमाडौँ, २१ बैशाख । मातातिर्थ औंशीको अवसरमा ट्रिटन इन्टरनेशनल सेकेण्डरी स्कुल सुविधानगरमा अध्ययनरत साना केटाकेटीका ममीलाई विद्यालयमै निम्ता गरेर ममीको मुख हेर्ने वातवरण विद्यालयले मिलाइदियो ।
त्यतिमात्रै नभई विद्यालयको तर्फबाट केटाकेटीमार्फत ती ममीहरुलाई शुभकामना कार्ड, उपहार र खानेकुरा समेत दिएर रमाइलो गरिएको थियो ।
त्यसो त विहान घरबाट विद्यालय आउँदा ति विद्यार्थीले तिनै ममीको अनुहार हेरिसकेका थिए । तैपनि आम हिन्दुहरुको महान पर्व मातातिर्थ औंशीको महत्वबारे केटाकेटीलाई जानकारी दिन विद्यालयमै ममीहरुलाई नित्याईएको विद्यालयका निर्देशक राजन सुवेदीले बताए ।
आफुलाई जन्म दिएर स्याहार सुसार गर्दै कर्म दिने ममीलाई जीवनभर उहाँको आदर गर्न, ममीको कहिल्यैपनि चित्त दुखाउन हुन्न भन्ने कुरा सिकाउन, ममीलाई मनपर्ने खाने कुरा, लगाउने कुरा र उपहार दिन सिकाउनका लागि विद्यालयमा ‘ममी र केटाकेटी’को भेट गराइ मातातिर्थ औंशी मनाइएको भाइस प्रिन्सिपल ममता शाहले बताइन ।
विद्यालयले सबै नेपाली परम्परागत चाडपर्वमा विद्यार्थीहरुलाई सहभागी गराई चाडपर्वको महत्वबारे व्यवहारिक रुपमै सिकाउँदै आएको छ ।
