काठमाडौँ, ५ वैहाख । शेयर बजारमा परिसूचक नेप्से दोहोरो अंकले बढेको छ ।
बिहीबार पनि शेयर बजारमा उच्च वृद्धि भएको छ । नेप्से परिसूचक १५ अंकले बढेर १ हजार २ सय ३२ अंक माथि पुगेको छ । सेन्सेटिभ परिसूचक पनि चार अंकले बढेको छ । बिहीबार १ सय ६५ कम्पनीको ७५ करोड १२ लाख रुपैयाँ बराबरको शेयर कारोबार भएको छ ।
कारोबारमा आएका समुहमध्ये बैंकिङ, विकास बैंक, माइक्रोफाइनान्स कम्पनी लगायतका समुहमा वृद्धि भएको छ । बीमा क्षेत्रका समुहमा भने गिरावट आएको छ । लगानीकर्ताको आकर्षण कुमारी बैंकमा सबैभन्दा बढी देखियो । यो बैंकको शेयर कारोबार ८ करोड ५८ लाख रुपैयाँ भन्दा बढीको भएको छ । कुमारी बैंकको दुई आर्थिक वर्षको बोनस सुरक्षित गर्ने अन्तिम दिन भएकाले पनि लगानीकर्ताले खरिद चाप बढाएको देखिन्छ ।
एसबिआई बैंकका शेयरधनीले सबैभन्दा बढी ६ दशमलव ६५ प्रतिशतले कमाएका छन भने माउण्टेन हाइड्रोका शेयरधनीले झण्डै ६ प्रतिशतले कमाएका छन् ।
