एजेन्सी, २९ माघ । हंगेरीका प्रधानमन्त्री भिक्टर अर्बनले आप्रवासी जनताको परनिर्भरता घटाउनका लागी तीन बच्चा जन्मिए २६ लाख रुपैयाँसम्मको ऋण मिनाहा र चार बच्चा जन्माउने महिलालाई जीवनभर आयकर छुट दिने घोषणा गरेको छ ।
बीबीसीका अनुसार प्रधानमन्त्री अर्बनले देशमा बच्चाहरुको जन्मदर बढाउने योजनाको घोषणा गर्दै नवविवाहित दम्पत्तिलाई बिनाब्याज २६ लाख रुपैयाँसम्मको ऋण दिने र उनीहरुका तीनवटा बच्चा जन्मिनासाथ ऋण मिनाहा गरिदिने बताएको छ ।
प्रधानमन्त्री अर्बनले भनेका छन्, ‘हंगेरीका जनता दोस्रो तरिकाले सोच्दछन् । हामीलाई संख्याको होइन, नागरिकको आवश्यकता छ ।’
हंगेरीको जनसंख्या हरेक वर्ष ३२ हजारको दरले घटेको छ र युरोपेली संघको तुलनामा यहाँका महिलाहरुको बच्चाको औसत संख्या कम छ ।
हंगेरीमा महिलाहरुको औसत १.४५ बच्चा छन् जुन युरोपेली संघको औसत १.५८ भन्दा कम हो । युरोपेली संघ अन्तर्गत फ्रान्सका महिलाहरुको सबैभन्दा बढी औसत १.९६ बच्चा छन् भने स्पेनमा सबैभन्दा कम १.३३ बच्चा छन् ।
