काठमाडौं, ९ माघ । नेपाल आयल निगमले टेकुस्थित आफ्ना भवनहरू खाली गरिदिन प्रहरीलाई आग्रह गरेको छ ।
तत्कालीन नेशनल ट्रेडिङको जग्गा तथा भवन गत वर्ष नै नेपाल आयल निगमले किनेको थियो । भूकम्पपछि महानगरीय प्रहरी परिसर र अपराध अपराध महाशाखाको कार्यालय नेशनल ट्रेडिङकै भवनमा बस्दै आएको छ ।
महानगरीय प्रहरी परिसरलाई भवन खाली गराइदिन पत्राचार गरिएको निगमका प्रवक्ता बिरेन्द्र गाइतले बताएका छन । अब आयल निगमले आफ्नो केन्द्रीय कार्यालय रहेको बबरमहलको भवन जीर्ण भएकोले अब कार्यालयका रुपमा प्रहरी बसिरहेकै भवन उपयोग गर्ने तयारी गरेको छ ।
नेशनल ट्रेडिङका कर्मचारीलाई अवकास दिने समयमा यो जग्गा निगमले किनको थियो । टेकुमा किनेको ४९ रोपनी जग्गामा नै अब निगमको केन्द्रीय कार्यालय राख्ने योजना छ ।
महनगरीय प्रहरी परिसरका प्रवक्ता होमेन्द्र बोगटी भने राजधानीको शान्ति सुरक्षाको जिम्मेवारी लिएर बसेको प्रहरीले एउटा पत्रका भरमा आफ्नो कार्यालय भवन सार्न नसक्ने बताउदै उनले भने, ‘हामी पनि सरकारकै अंग हौं । यो विषय सुरक्षाजस्तो संवेदनशील विषयसँग जोडिएको छ,। ’ यो घरबेटीले कोठामा बस्नेलाई आदेश दिएजस्तो विषय हैन ।’
