काठमाडौँ, २७ पौष । प्रमुख प्रतिपक्षिदल नेपाली काग्रेसको भातृ संगठन नेपाल विद्यार्थी संघमा सात जना पदाधिकारीले पार्टी सभापति शेरबहादुर देउवा समक्ष राजिनामा बुझाएसँगै संगठनमा एक प्रकारको भुँइचालो नै गएको छ ।
शुक्रबार तीन उपाध्यक्ष, एक महामन्त्री र तीन जना सहमहामन्त्रीहरुले सभापति देउवा समक्ष राजीनामा बुझाएका हुन् । राजीनामा बुझाउनेहरुमा तीन जना उपाध्यक्षमा सञ्जीवकुमार यादव, पुष्प शाही र विकास केसी रहेका छन् । यसैगरी महामन्त्री सरोज थापा, सहमहामन्त्रीहरु प्रकाश घिमिरे, अच्युत केसी र प्रेम जोशीले पनि राजीनामा दिएका हुन् ।
राजिनमा दिने पदाधिकारीले तोकिएको मितिमा अधिवेशन गर्न सकिएन, यस्तो अवस्थाले नेविसंघ चल्दैन, त्यसैले निकास दिनका लागि पार्टी सभापतिलाई संयुक्तरुपमा राजीनामा बुझाएको जानकारी गराएका हुन् ।
भदौमा हुने भनिएको नेविसंघको महाधिवेशन आन्तरिक विवादका कारण हुन नसकेपछि पार्टीले तीन महिनाको समय अवधि थपिदिएको थियो । महाधिवेशन गर्ने सर्तमा पछिल्लो पटक थपिएको दुई महिनाको म्याद पनि माघ २ गते सकिँदैछ ।
