बुटवल, १८ मङ्सिर । प्रदेश नं ५ का मुख्यमन्त्री शङ्कर पोखरेलले देशमा नै रोजगारीको वातावरण सिर्जना गर्न कृषि उत्पादनमा युवाहरुलाई जोड्न जग्गा भाडा सरकारले व्यहोर्ने बताउनुभएको छ ।
भैरहवामा आजदेखि शुरु भएको प्रदेशस्तरीय प्रशंसनीय खोज सम्मेलनको उद्घाटन गर्दै मुख्यमन्त्री पोखरेलले प्रदेशको समृद्धिका आधार कृषि, पर्यटन, उद्योग र व्यापार भएको बताउनुभएको छ ।
कृषिको आधुनिकीकरण, बजारीकरण र व्यापारीकरण जरुरी रहेको उल्लेख गर्दै उहाँले बेरोजगार मेहनती युवालाई कृषि उत्पादनमा जोड्न जग्गा भाडासमेत तिरिदिनेगरी प्रदेश सरकारले स्वरोजगार बनाउने कार्यक्रम अगाडि सारेको जानकारी गराउनुभयो ।
उहाँले प्रदेश ५ मा २९ प्रतिशत जनता गरीबीको रेखामुनि रहेको बताउँदै आगामी पाँच वर्षभित्र यो प्रतिशत १० मा झार्न बताउनुभयो । उहाँले मुख्यमन्त्री ग्रामीण विकास कार्यक्रमअन्तर्गत प्रदेशका ३५ पालिकामा विभिन्न गरीबी निवारणका कार्यक्रम सञ्चालन गर्ने समेत जानकारी गराउनुभयो ।
