विराटनगर, १८ मङ्सिर । प्रदेश नं १ का मुख्यमन्त्री शेरधन राईले अगामी मङ्सिर महिना भित्र नै प्रदेश सरकार विस्तार गर्दै पुसको पहिलो सातासम्ममा प्रदेश नं. १ को नाम र स्थायी राजधानी सहमतिमा टुङ्गो लाग्ने बताउनुभएको छ ।
विराटनगर विमानस्थलमा सोमवार साँझ सञ्चारकर्मीसँग कुरा गर्दै मुख्यमन्त्री राईले धेरै विभागसँगै राखेर मन्त्रालय चलाउन अप्ठ्यारो भएको हुनाले मन्त्रालय विभाजन गरी मन्त्रिपरिषद् विस्तार गर्ने तयारी भइरहेको जानकारी दिनुभयो ।
मुख्यमन्त्री राईले प्रदेशको नाम र स्थायी राजधानीको विषय माथिल्लो तहमा टुङ्गो लागिसकेको जानकारी दिँदै आगामी हिउँदे अधिवेशनमा यस विषयको टुङ्गो लाग्ने विश्वास व्यक्त गर्नुभयो ।
