काठमाडौँ, १५ मङ्सिर । प्रधानमन्त्री केपी शर्मा ओलीले नेपाल जस्तो विविधतापूर्ण समाजमा वार्ता, समझदारी, आपसी सम्मान, सम्झौता र संलग्नताले भित्री र बाह्य द्वन्द्वलाई सफलतापूर्वक समाधान गर्न सकिन्छ भन्ने उदाहरण नेपालले विश्वसामु देखाएको बताउनुभएको छ ।
एशिया प्रशान्त शिखर सम्मेलनलाई आज सम्बोधन गर्दै प्रधानमन्त्री ओलीले नेपालको शान्ति प्रक्रिया नेपालीले नै स्थापना र नेतृत्व गरेको, स्वामित्व लिएको र बलियो बनाएको तथा नेपाली जनताले साहासीपूर्ण र दृढ निर्णय लिएको उल्लेख गर्नुभयो । उहाँले हामीले जनताका प्रतिनिधिबाट संविधान लेखनको ऐतिहासिक जिम्मेवारी पनि सम्पन्न गरेको उल्लेख गर्नुभएको छ ।
प्रधानमन्त्री ओलीले प्रतिस्पर्धात्मक बहुदलीय प्रजातन्त्र, कानूनी राज्य, स्वतन्त्र न्यायपालिकाका साथ हामीसँग सबैभन्दा राम्रो संविधानमध्ये एक छ भन्नेमा विश्वास रहेको बताउनुभयो । उहाँले अबका दिनमा नेपालले अधिकारको निम्ती राजनीतिक रुपमा थप सङ्घर्ष गर्नु नपर्ने भन्दै नेपाली जनताका लागि नयाँ युग शुरुवात गरेको बताउनुभयो ।
प्रधानमन्त्री ओलीले नेपालले समानता, आपसी सम्मान तथा लाभका सिद्धान्तका आधारमा छिमेकी मुलुकसँग मैत्रीपूर्ण, सहयोगात्मक, सन्तुलित सम्बन्ध राखेको र स्वतन्त्र कूटनीति सञ्चालन गरेको बताउँदै विश्वका प्रमुख शक्तिसँग नेपालको सम्बन्ध हुनाका साथै क्षेत्रीय सम्बन्ध बलियो, बढी स्पष्ट र उत्पादक बनेको उल्लेख गर्नुभयो ।
