काठमाडौँ, ७ मङ्सिर । नेपाल कम्युनिष्ट पार्टी (नेकपा)को सचिवालय बैठकले आगामी बैठकमा सरकार, पार्टी र संसद् संचालनसम्बन्धी नयाँ कार्ययोजना बनाउने निर्णय गरेको हो ।
प्रधानमन्त्री निवास बालुवाटारमा आज सम्पन्न सचिवालय बैठकमा प्रदेश कमिटीको एकीकरण र गठनको पूर्णताका लागि सुझाव दिन गठित कार्यदलको प्रतिवेदनमाथि छलफल भएको हो । राजधानीमा विशेष जिल्ला कमिटी बनाउने समेत निर्णय गरेको छ ।
नयाँ बन्ने विशेष जिल्ला कमिटीहरु अबदेखि छुट्टै विशेष प्रदेश कमिटीको हैसियतमा कमिटी गठन गरी त्यसको मातहतमा परिचालन गर्ने निर्णय बैठकले गरेको छ ।
नेकपाका महासचिव विष्णु पौडेल र नेता रामबहादुर थापा सदस्य रहेको कार्यदलले बिहीबारको बैठकमा सो प्रस्ताव पेश गर्नुभएको थियो । त्यस्तै प्रदेश कमिटीको एकीकरणको विषयलाई टुङ्गो लगाएपछि साङ्गठनिक एकीकरण र कार्यविभाजन हुने भएको छ ।
