(कात्तिक २५, काठमाडौँ) । इंग्लिस प्रिमियर लिग अन्तर्गत शनिबार राति भएको खेलमा टोटनह्यामले क्रिष्टल प्यालेसलाई हराएको छ ।
क्रिष्टल प्यालेसलाई १–० ले हराउँदै टोटनह्याम विजयी भएको हो । यो जीतसँगै शीर्ष स्थानको म्यानचेस्टर सिटीसँगको दूरी छोट्याएको छ । प्यालेसको मैदानमा भएको खलमा हुवान फोइथको दोस्रो हाफको गोल निर्णायक बन्यो । उनले ६६औं मिनेटमा गोल गरेका थिए ।
टोटनह्यामले जित हात पारेपनि लिगको चौथो स्थानमा याथवत रहेको छ । टोटनह्यामको १२ खेलबाट २७ अंक भएको छ । लिगको शीर्ष स्थानमा भने म्यानचेस्टर सिटी रहेको छ । सिटीको ११ खेलबाट २९ अंक रहेको छ । त्यस्तै, दोस्रो स्थानमा रहेको चेल्सीको ११ खेलबाट २७ अंक रहँदा तेस्रो स्थानमा रहेको लिभरपुलको पनि समान खेलबाट २७ अंक नै रहेको छ ।
शनिबार राति नै भएका अन्य खेलमा कार्डिफ सिटीले ब्रिगटोनलाई २–१ गोलले पराजित गर्दा न्युक्यास्टलले बोर्नेमाउथलाई २–१ गोलअन्तरले नै पराजित गरेको छ । त्यस्तै, वेष्टहामले हन्डर्सफिल्डसँग १–१ गोलको बराबरी खेल्दा वाटफोर्ड पनि साउथहाम्पटनसँग १–१ गोलको बराबरीमा रोकिएको छ । अर्को खेलमा भने लेष्टर सिटीले बर्नेलीसँग गोलरहित बराबरी खेल्दै अंक बाँडेको छ ।
