(भदौ २४, एजेन्सी) । इजिप्टको अदालतले सन् २०१३ को विरोध प्रदर्शनमा संलग्न ७५ जनालाई शनिबार मृत्युदण्डको सजायँ सुनाएको छ भने दर्जनौं मानिसहरुलाई आजिवन कारावासको सजाय सुनाएको छ ।
पूर्व राष्ट्रपति मोहम्मद मोरसीको समर्थमा भएको हिंस्रक प्रदर्शनका क्रममा भएको घटनालाई आधार वनाई सात सय बढीलाई अभियुक्त बनाइएको थियो । एम्नेस्टी इन्टरनेशनलले अदालतको यो निर्णयमा असुन्तुष्टि जनाएको छ ।
एम्नेस्टी इन्टरनेशनलका हुसैन बामीले भने, ‘अदालतमा अभियुक्तको पक्षमा सबै प्रत्यक्षदर्शी र प्रमाण पेश गर्न दिइएन । तर दोस्रो पक्षले जुन पनि प्रमाण अदालतमा ल्याइरहेका थिए त्यसलाई स्विकार गरिएको थियो । सबै ७५ को मृत्युदण्ड राजनीतिक रुपमा प्रेरित छ । यो निर्णयले वर्तमान सरकारविरुद्ध प्रदर्शन गर्नेहरुलाई यस्तै सजायँ दिइनेछ भनी जानकारी दिन खोजेको छ । यता सुरक्षाबललाई निकै सजिलै माफी दिइएको छ ।’
सन् २०१३ मा धेरैजसो प्रदर्शनकारी काहिराको राबा अल–अदविरा स्क्वेयरमा मारिएका थिए । उक्त प्रदर्शनकारी मोरसीका समर्थक र मुस्लिम ब्रदरहुडका सदस्य थिए । प्रदर्शनकारी अब्देल फतह अल–सिसीका सैन्य ‘कू’विरुद्ध मोरसीका समर्थकले प्रदर्शन गरिरहेका थिए । अल–सिसीले तीन जुलाई सन् २०१३ मा ‘कू’ गरेको थियो ।
सन् २०१३ मा इजिप्टको राजधानी काहिरामा प्रदर्शनको क्रममा सुरक्षाबलले कम्तीमा आठ सयको हत्या गरेका थिए ।
