(साउन १२, ललितपुर) । नेपाल पत्रकार महासंघ महिला विभागद्वारा आयोजित महिला फुटबल प्रतियोगितामा अनलाईन मिडियालाई २–१ गोल गर्दै प्रतियोगिताको उपाधि प्रिन्ट मिडियाले जितेको छ ।
‘महिला पत्रकार कोषका लागि एक गोल’ भन्ने नाराका साथ शनिबार सातदोबाटो स्थित एन्फा मैदानमा भएको प्रतियोगितामा विजेता टोली प्रिन्टका लागि पून्यवती ढकाल र भाषा शर्माले १–१ गोल गरेका थिए भने अनलाइनका तर्फबाट मुना कार्कीले मात्र १ गोल गरेकी थिइन् । समयका अभावका कारण खेल बीचमै रोकेर पेनाल्टीमार्फत विजेता घोषित गरिएको थियो ।
प्रतियोगितामा रेडियो र टेलिभिजनले संयुक्तरुपमा तेस्रो स्थान प्राप्त गरे । निर्धारित २० मिनेटको खेलमा दुवै टोलीले गोल गर्न नसकेपछि दुवै टोलीलाई तेस्रो भएको घोषणा गरिएको थियो ।
यसअघि प्रतियोगिताको उद्घाटन गर्दै युवा तथा खेलकुद मन्त्री जगतबहादुर सुनार विश्वकर्माले खेलकुद क्षेत्रका समस्याबारे पत्रकारहरुले आ–आफ्नो मिडियाबाट खबरदारी गर्न आग्रह गरे । त्यस्तै खेलकुदको क्षेत्रबाट मुलुकको समृद्धि गर्न सकिने बताउँदै उनले नेपालमा अन्तर्राष्ट्रियस्तरका खेल मैदान निर्माण थालिने बताए । मन्त्री विश्वकर्माले विजेता टोलीले प्राप्त गर्ने गरी प्रोत्साहनस्वरुप रु १० हजार महासंघका कोषाध्यक्ष राजेश मिश्रलाई हस्तान्तरण गरे । विजेता तथा उपविजेता टोलीलाई ट्रफी प्रदान गरीएको छ ।
