(जेठ २७, धनुषा) । जनकपुरका एक युवकले साइबर अपराध नियन्त्रण गर्ने यन्त्र बनाएका छन् ।
कम्प्युटर इञ्जिनियर गरिरहेका जनकपुर उपमहानगरपालिका ९ बस्ने २७ वर्षका सुभाष कुँवरले यो यन्त्र बनाएका छन् । सुभाषले दुई वर्षअघि बनाएको एटीआई यन्त्र केही दिनअघि जनकपुर विमानस्थलमा जडान गरेका छन् ।
यन्त्रले पर्यटक लगायत सर्वसाधारणहरुलाई फाइदा हुने र साइबर अपराध लगायत अबान्छित गतिविधिहरु नियन्त्रण गर्ने बताएका छन् । उनका अनुसार एटीआई यन्त्र भनेको अंग्रेजीमा एनी टाईम ईन्टरनेट सेवा हो । यो चौबीसै घण्टा फ्री इन्टरनेट अथवा वाईफाई सेवा जस्तै हुन्छ । यसको प्रयोग गर्न पसवर्ड हाल्नु पर्छ । जुन पासवर्ड एटीआई यन्त्रबाट लिन सकिन्छ । फ्री र्वाइफाई जडान गर्न र ठाउँको विषयमा विषेश जानकारी लिन चाहने व्यक्तिले जडान गरिएको एटीआई यन्त्रबाट पासवर्ड लिन सक्छन् ।
वाईफाई प्रयोग गर्न चाहने व्यक्तिले एटीआई यन्त्रबाट पासवर्ड लिन प्रेसस्वीच थिच्नु पर्छ । जसले वाईफाई कनेक्टको लागि पासवर्ड अर्थात युजरनेमसहितको एउटा एटीएमको पर्चि जस्तै पेपर दिन्छ । जसमा पासवर्ड हुन्छ ।
उनले यो यन्त्र विश्वमै पहिलो पटक आफूले बनाएको र एउटा एटीआई यन्त्र निर्माण गर्न कम्तिमा डेढदेखि २ लाख रुपैयाँसम्म पर्ने बताए ।
