काठमाडौँ, २८ बैशाख । पूर्वराष्ट्रपति विद्यादेवी भण्डारी र अध्यक्ष केपी शर्मा ओलीबीच भेटवार्ता भएको छ ।
नेकपा एमालेमा नेतृत्व परिवर्तन र पार्टी पुनर्गठनको अभियान चलिरहेका बेला आज गुण्डु पुगेकी भण्डारीले पत्थरीको शल्यक्रियापछि आराम गरिरहेका ओलीलाई निवासमै पुगेर स्वास्थ्य अवस्थाको बारेमा जानकारी लिएको बताइएको छ ।
एमालेमा सक्रिय हुन चाहे पनि ओलीका कारण सदस्यता स्थगनको अवस्थामा रहेका बेला भण्डारीले फेरि पनि एमालेको विकास र विस्तारमा आफ्नो क्षमता लगाउने घोषणा गर्दै आएकी छन् ।
एमालेमा पदाधिकारीहरुकै तहबाट ओलीलाई राजीनामा गराएर पार्टी पुनर्गठनको प्रयास भइरहेका बेला उनीहरुले भण्डारीसँग पनि पटकपटक छलफल गरेका छन् । आइतबार गुण्डुमा पछिल्लो अवस्थाका बारेमा पनि पूर्वराष्ट्रपति भण्डारी र पूर्वप्रधानमन्त्री ओलीबीच गम्भीर छलफल भएको बताइएको छ ।
