बुटवल, २० मंसिर । उपप्रधान एवं अर्थमन्त्री विष्णुप्रसाद पौडेलले कुनै पनि कर्मचारी तथा राजकीय पदमा नियुक्त भएका व्यक्तिहरुले सरकारलाई नटेर्ने र चुचनैती दिन खोज्ने प्रवृत्ति अनुचित भएका बताएका छन् ।
बिहीबार बुटवलमा आयोजित नेपाल विद्युत् प्राधिकरण कर्मचारी युनियनको ११औँ केन्द्रीय सभामा उनले यस्तो प्रवृत्ति सहज ढंगले अन्त्य होस् भन्ने सरकारले चाहेको बताए । उनले विद्युत् प्राधिकरण आफैँ सबल र सक्षम नहुँदासम्म कर्मचारी सफल हुन नसक्ने पनि बताए ।
डेडिकेटेड तथा ट्रंकलाइनबाट विद्युत् उपयोग गरेका उद्योगसँग बक्यौता असुल गरेरै छाड्ने बताएका छन् । प्राधिकरणले पनि उद्योगीले उपयोग गरेको विद्युत्को बिल उपलब्ध गराउन सक्नुपर्नेमा उनले जोड दिए । उनले डेडिकेटेड तथा ट्रंकलाइनसम्बन्धी विवाद छिटै समाधान हुने बताए । कर्मचारीको ५२ महिनादेखि रोकिएको बिमा र सेवा–सुविधाका विषयमा सरकारले छलफलबाट समाधान निकाल्ने उनले प्रतिबद्धता व्यक्त गरे ।
