काठमाडौँ, १७ साउन । नेट्फिल्क्सले बुधबार नेपाली सबटाइटलमा नेपाली महिला पर्वतारोही लाक्पा शेर्पाबारेको फिल्म ‘माउण्टेन क्वीन : द समिट्स अफ लाक्पा शेर्पा’ रिलिज गरेको छ ।
नेट्फिल्क्सले पहिलोपटक नेपाली भाषामा सबटाइटलसहित कुनै फिल्म स्ट्रिमिङ गरेको हो । फिल्मले लाक्पाको दशौं पटकको सगरमाथा आरोहणको यात्रालाई पछ्याउँछ । उनको निजी जीवनबारे पनि चित्रण गर्छ ।
१ घण्टा ४१ मिनेट लामो डकुमेन्ट्रीले लाक्पाका पूर्वपति तथा रोमानियाली पर्वतारोही गेओर्गे डिजमारेस्कुसँगको हिंसापूर्ण सम्बन्धबारे पनि अन्वेषण गर्छ । यो फिल्मलाई ओस्कार मनोनित लुसी वाकरले निर्देशन गरेकी हुन्, जसको फिल्म ‘ब्लाइन्डसाइट’ले उत्तरी मोहडाबाट सगरमाथा आरोहण गर्ने ६ जना दृष्टिविहीन तिब्बती किशोरीलाई वर्णन गरेको थियो ।
