काठमाडौँ, २५ वैशाख । न्यायाधीशसँग सेटिङ गरेर मुद्दा जिताइदिने र कारागारमुक्त गराइदिने भन्दै ठगी गरेको आरोपमा एक जना पक्राउ परेका छन् ।
जिल्ला प्रहरी परिसर काठमाडौँको टोलीले सोल्टीमोडबाट ओखलढुंगाको सुनकोशी गाउँपालिका–१ घर भएका ३७ वर्षीय कृष्ण कार्कीलाई पक्राउ गरेको हो ।
उनलाई ५ दिन हिरासतमा राखेर अनुसन्धान गर्न प्रहरीले काठमाडौँ जिल्ला अदालतबाट अनुमति लिएको छ । भन्सार छलीको मुद्दामा कारागारमा रहेका लमजुङका बिलबहादुर गुरुङलाई छुटाइदिने भन्दै उनले ७ लाख रुपैयाँ लिएको आरोप लागेको छ ।
त्यस्तै जग्गा सम्बन्धीको मुद्दा मिलाइदिन्छु भन्दै धादिङ घर भएका भरत गुरुङसँग पनि २३ लाख रुपैयाँ ठगी गरेको आरोपपनि कार्कीमाथि छ । गुरुङको ललितपुरमा एउटा जग्गा सम्बन्धी विवाद रहेका बेला आफ्नो न्यायाधीशसँग राम्रो सम्बन्ध रहेको भन्दै केश मिलाइदिने भनेर उनले २३ लाख रुपैयाँ लिएको देखिएको प्रहरीको भनाइ छ ।
