पोखरा, २२ वैशाख । नेकपा (एमाले)ले स्थानीय तहमा आफ्नो पार्टीबाट निर्वाचित जनप्रतिनिधिहरूलाई आयोजना गरेको तिन दिने प्रशिक्षण शनिबार पोखरामा शुरु भएको छ ।
प्रशिक्षणको पार्टी स्थायी कमिटी सदस्य थममाया थापाले उदघाटन गर्नु भएको थियो । थापाले एमालेका नेतृत्वमा रहेका पालिकाहरू सुशासन र विकासका नमुना बनाउने उद्देश्यले सो कार्यक्रम आयोजना गरिएको उल्लेख गर्नुभयो । आफ्नो पार्टीले पारदर्शिता जवाफदेहिता सहितको विधिको सुशासनमा जोड दिदै आएको र आफ्ना जनप्रतिनिधि त्यसमा अब्बल हुनुपर्ने मान्यता अनुरुप काम गर्न आग्रह गर्नुभयो ।
एमाले गण्डकी प्रदेश कमिटीका अध्यक्ष नवराज शर्माले पार्टी र जन-प्रतिनिधिबीचको समन्वय र सहकार्यले मात्रै निर्धारित लक्ष्य पुरा हुने भन्दै सुखी नेपाली सम्वृद्ध नेपालको सपना पुरा गर्न प्रशिक्षण फलदायी हुने बिश्वास ब्यक्त गर्नु भयो ।
प्रदेश कमिटी सचिब धनन्जय दवाडीले जनताका काम थप मजबुत तवरले छिटो छरितो परिणाममुखी बनाउन सहजीकरण होस् भन्ने उद्देश्यले प्रशिक्षण आयोजना गरिएको बताउनुभयो । एमाले पोलिटब्युरो सदस्य तथा केन्द्रीय स्थानीय विकास विभाग प्रमुख देबेन्द्र दाहाल, सचिव हर्कराज राइ, पार्टीको केन्द्रीय स्कुल विभाग सदस्य रामशरण प्याकुरेल सहितका नेताहरूले उक्त प्रशिक्षणमा सहजिकरण गर्ने सचिव दवाडीले बताउनुभयो ।
प्रशिक्षणमा एमालेबाट गण्डकी प्रदेशका स्थानीय तहमा निर्वाचित प्रमुख, उप-प्रमुख, जिल्ला समन्वय समितिका प्रमुख, उप-प्रमुख र प्रत्येक जिल्लाबाट एक जना वडा अध्यक्ष सहित पार्टीका जिल्ला कमिटि अध्यक्ष र इन्चार्जहरू गरी करिब एक सय जनाको सहभागिता रहेको एमाले गण्डकी प्रदेशका उप-सचिव तथा प्रचार एबम प्रकासन विभाग प्रमुख मन्जु अधिकारीले जानकारी दिनुभयो ।
