जुम्ला, २४ फागुन । जुम्लामा हिउँमा फसेर अलपत्र परेका आठ जनाको हेलिकप्टरबाट उद्धार भएको छ ।
तातोपानी गाउँपालिका–४ गिडिदहको शिरान बजेडी पाटनमा फसेकाहरूलाई पालिका र प्रशासनको पहलमा कर्णाली प्रदेश सरकारको समन्वयमा हेलिकप्टरबाट उद्धार गरिएको हो ।
प्रमुख जिल्ला अधिकारी जयकुमार घिमिरेका अनुसार कर्णाली प्रदेश सरकार आन्तरिक मामिला तथा कानुन मन्त्रालयले नेपाली सेनाको हेलिकप्टरमा बजेडिपाटनबाट जुम्ला विमानस्थलमा तीन चरणमा उद्धार गरेको छ । सबैको स्वास्थ्य जाँचका लागि नेपाली सेनाको एम्बुलेन्समा कर्णाली स्वास्थ्य विज्ञान प्रतिष्ठान शिक्षण अस्पताल पठाइएको छ ।
