पोखरा, २४ पौष । जिल्ला समन्वय समिति कास्कीले पहिलो पटक नदीजन्य तथा खानीजन्य पदार्थ सम्बन्धी अन्तरक्रिया कार्यक्रम मंगलबार सम्पन्न गरेको छ ।
कार्यक्रममा नदिजन्य तथा खानीजन्य पदार्थको उत्खनन् सम्बन्धी जिल्ला अनुगमन समिति कास्कीका संयोजक तथा जिल्ला समन्वय समिती कास्कीका प्रमुख लिलाधर पौडेलले राज्यका निति नियम भित्र रहेर नदी तथा खानिजन्य पदार्थको उत्खनन् गर्न आग्रह गर्नुभयो ।
कतिपय स्थानमा लापरबाहीपूर्वक गरिएका उत्खननले विकास निर्माण ध्वस्त पारेको, खतरा उन्मुख रहेको पाइएको हुँदा सो प्रती सचेत हुन स्थानिय सरोकारवाला सहित व्यवसायीहरूलाई आग्रह गर्नुभयो । ब्यवसायीहरू विकासका बहाक र सहयात्री समेत भएको भन्दै बनेका विकास आयोजनाको संरक्षण र प्राकृतिक स्रोतहरूको समेत मैत्रीपूर्ण प्रयोगमा कुनै गल्ती नगर्न स्थानीय तहहरूलाइ आग्रह गर्नुभयो ।
पौडेलले कास्कीका अधिकांश खानी जन्य उद्योग मापदण्ड विपरित संचालन भएको आफुहरूको अनुगमनले भेट्टाएको भन्दै ब्यवस्थित वातावरण निर्माणका लागि वार्षिक कार्ययोजना अनुसार उक्त अन्तरक्रीया कार्यक्रम आयोजना गरिएको उल्लेख गर्नुभयो । प्रमुख पौडेलले सरकारका अंग, नागरिक, ब्यवसायीहरूको सहकार्यले मात्रै कानुनी राज्यको अनुभुति हुने हुँदा कुनै पनि विकासका लागि आवश्यक सुशासन निर्माणमा घनिभुत तवरले लागि पर्न आग्रह गर्नुभयो ।
पोखरा महानगर पालिकाका प्रमुख धनराज आचार्यले राज्यका कानुन र निति नियमको पूर्ण पालना सहित कठिनाईहरूको निराकरण गर्नु पर्ने भन्दै प्रकृति मैत्री विकासमा पोखरा महानगर प्रतिबद्ध रहेको उल्लेख गर्नुभयो । कार्यक्रम नदीजन्य तथा खानीजन्य पदार्थको उत्खनन् सम्बन्धी जिल्ला अनुगमन समिति कास्कीका सहसंयोजक कास्कीका प्रमुख जिल्ला अधिकारी बासुदेब घिमिरेले प्राकृतिक स्रोतको संरक्षणात्मक उपयोगमा ध्यान दिदै विकास निर्माणका कार्य संचालन गर्नु पर्ने भन्दै कुनै पनि नागरिकले राज्यका कानुन र नियम मान्दिन भन्न नपाइने र यदि कानुन मापदण्ड पालना नगरेको पाइएमा त्यो क्षम्य नहुने बताउनुभयो ।
राज्यलाई राजश्व तथा कर तिरेर मात्रै बैधानिकता प्राप्त नहुने भन्दै राज्यले समय परिस्थिति अनुसार हरेक क्षेत्रमा मापदण्ड तोक्ने हुँदा सो को पूर्ण पालनाको बिकल्प नभएको उल्लेख गर्नुभयो । उहाँले निकट भबिष्यमा हुने अनुगमनमा मापदण्ड पालना नगरेको पाइएमा तत स्थानमै तत्काल कारबाही हुने उल्लेख गर्नुभयो । कास्कीका प्रहरी प्रमुख एसपी मोहन कुमार थापाले गैर कानुनी उत्खनन र निकासी नियन्त्रणमा आफ्नो संयन्त्र प्रभावकारी तवरले संचालन भएको भन्दै कुनै अबैध कार्य भेटिएमा तत्काल सूचना दिन आग्रह गर्नुभयो ।
क्रशर उद्योग ब्यवसायी महासंघ गण्डकीका अध्यक्ष लिलाधर बरालले बैधानिक नदी र खानिजन्य ब्यवसायीले बिगत ८ वर्ष देखि डोजर नचलाएको दाबी गर्नुभयो । यदि त्यस्तो पाइएमा ठाडो कारबाही गर्न उहाँले आग्रह गर्नुभयो । आफुहरू सरकारलाइ हरहमेशा सहयोग गर्न तयार रहेको बरालको भनाइ थियो । जिल्ला समन्वय अधिकारी नवराज बरालले अहिलेको मापदण्ड अनुसार कास्कीका कुनै पनि क्रशर उद्योग संचालन नभएको उल्लेख गर्नुभयो । बरालले अबैधानिक र अप्राकृतिक उत्खनन तत्काल रोक्न आग्रह गर्नुभयो ।
कार्यक्रममा कास्कीका उप प्रमुख सरिता माल सहित नदिजन्य तथा खानीजन्य पदार्थको उत्खनन् सम्बन्धी जिल्ला अनुगमन समितिका पदाधिकारी सहित स्थानीय तहका प्रमुख, एक्याप, ब्यवसायी र सरोकारवालाहरूले सो क्षेत्रलाई ब्यबस्थित गराउने बारेमा आआफ्नो धारणा राख्नुभएको थियो । कार्यक्रम नदीजन्य तथा खानीजन्य पदार्थको उत्खनन् सम्बन्धी जिल्ला अनुगमन समिति कास्कीका संयोजक लिलाधर पौडेलको अध्यक्षतामा सम्पन्न कार्यक्रमको संचालन जिल्ला समन्वय अधिकारी नवराज बरालले गर्नुभएको थियो ।
