काठमाडौँ, २४ मंसिर । प्रधानमन्त्री पुष्पकमल दाहाल प्रचण्डले सङ्क्रमणकालीन न्याय टुङ्गोमा पुर्याउन आफूले निरन्तर पहल गरिरहेको बताएका छन् ।
आइतबार ७५ औँ अन्तर्राष्ट्रिय मानव अधिकार दिवसको अवसरमा आइतबार काठमाडौँमा सम्बोधन गर्दै उनले सङ्क्रमणकालीन न्याय टुङ्गोमा पुर्याउन ढिला भइरहेकोप्रति चिन्दा व्यक्त गरे । उनले आम राष्ट्रिय सहमति बनाउनका लागि प्रधानमन्त्रीको हैसियतले आफूले पहल गरिरहेको जिकिर गरेका छन् । यस्तै उनले आयोगका सिफारिस आउने दिनमा एक्सनमा जोड दिने, क्षतिपूर्तिमा लागि आयोगले गरेको सिफारिस कार्यान्वयनका लागि आगामी दिनमा छुट्टै बजेटको व्यवस्था गरिने प्रतिबद्धता जनाए । आरोपित व्यक्तिलाई विभागीय कारबाहीको विषयमा सरकारले बेला बेला आयोगलाई जानकारी दिएको बताए ।
उनले भने– ‘सङ्क्रमणकालीन न्याय टुङ्गोमा पुर्याउन ढिलाइ भइरहेको छ । यसलाई आम राष्ट्रिय सहमति बनाउन प्रधानमन्त्रीको हैसियतमा मैले लगातार पहल गरिरहेको जानकारी गराउन चाहन्छु । राष्ट्रिय मानवअधिकार आयोगका सिफारिसलाई सरकारले एजेन्डा बनाउने कुरामा कहीँ न कहीँ कमी गरेको आलोचना गम्भीर रूपमा उठाइयो । आयोगको ऐन बनाउने कुरा तीव्रता दिने कुरा उठाइयो । आयोगको सिफारिसलाई शत प्रतिशत कार्यान्वयन गर्ने विश्वास दिलाउन चाहन्छु ।’
