काठमाडौँ, २२ कार्तिक । धुम्बाराहीमा सञ्चालित जुवा अड्डामा प्रहरीले गएराति छापा मारेर ७ जना जुवाडेहरुलाई पक्राउ गरेको छ ।
जिल्ला प्रहरी परिसर काठमाडौँका अनुसार गएराति साढे २ बजे छापा मारेर धुम्बाराही पिपलबोटस्थित सुन्दर कार्कीले बनाएको दुईतले जस्ताको टहराको भुँइ तलामा जुवा खेलेको अवस्थामा ७ जना जुवाडेहरुलाई पक्राउ गरेको हो ।
जुवाखालबाट पक्राउ पर्नेमा दोलखा घर भएका ४० वर्षीय किरन थापा, भक्तपुरको सूर्यविनायक घर भएका सुशील लामा, दोलखाका सुन्दर कार्की, रामेछापका सुमन श्रेष्ठ, धादिङका कुमार रोका, हेटौंडा घर भएका कृष्णबहादुर मोक्तान र खोटाङ घर भएकी २९ वर्षीया निशाना राई छन् ।
घटनास्थलबाट प्रहरीले २ लाख ९२ हजार नगद र २० हजारको १ थान चेक बरामद गरेको छ । खालमा ११ बुक तास पनि भेटिएको र थप अनुसन्धानका लागी आरोपितहरुलाई प्रहरी वृत महाराजगञ्जमा राखिएको छ ।
