तैँ चुप मैँ चुपको धन्दा हामी चलाउँदैनौँ : मन्त्री श्रेष्ठ

काठमाडौँ, १५ असोज । गृहमन्त्री नारायणकाजी श्रेष्ठले सरकारमा बसेर तैँ चुप मैँ चुपको धन्दा नचलाउने बताएका छन् ।

आज काठमाडौँमा आयोजित एक कार्यक्रममा बोल्दै भ्रष्टाचारविरुद्ध सुशासनको अभियान सरकारले जारी राख्ने बताए । उनले भने, ‘सरकारमा पनि रहिराख्ने अनि तैं चुप मैँ चुपको धन्दा हामी चलाउँदैनौँ । सुशासन, समृद्धि र सामाजिक न्यायलाई सरकारले मूल मन्त्र बनाएको छ । यो अभियान जारी रहन्छ,पूर्णविराम लाग्दैन’ ‘हामी भ्रष्टाचारविरुद्धको अभियान अगाडि बढाउँछौँ । अपराधीकरणको प्रभावकारी नियन्त्रण गरी दण्डहीनताको अन्त्य गर्छौँ ।’

कर्मचारीले सुराकीका नाममा र मन्त्रीले अपारदर्शी रूपले खर्च गर्न पाउने पञ्चायतकालीन प्रावधान खारेज गरेर सुशासनको अभियान अगाडि बढाएको श्रेष्ठले बताए ।