काठमाडौँ, ३१ भदौ । अपराध अनुसन्धान पूर्ण नभएसम्म प्राप्त सूचना चुहाउनु अनुसन्धान अधिकारीको गैरव्यावसायिक कर्म मानिन्छ । तर, पछिल्ला ठूला एवं चर्चित अपराध घटनाका अनुसन्धानमा नेपाल प्रहरीका अनुसन्धान अधिकारीहरूले एकपछि अर्कोगरी सूचना चुहाएका छन् ।
विशेषगरी नक्कली भुटानी शरणार्थी प्रकरण र सुन तस्करी प्रकरणमा प्रहरी अनुसन्धानका क्रममा प्राप्त केही तथ्य र सूचना सामाजिक सञ्जाल, नेताका बोली र सञ्चारमाध्यममा आइरहे । अनुसन्धान नसकिँदै राजनीतिक शक्ति केन्द्रका घरदैलोसम्म पनि यस्ता सूचना पुगे ।अनुसन्धान नसकीकन यसरी सूचना चुहाउँदा केही मानिस सामाजिक रूपमा दोषी करार भए । सार्वजनिक रूपमा उनीहरूको आलोचना भयो, भइरहेको छ । तर, अनुसन्धान प्रतिवेदन भने भिन्न आएका छन् ।
अनुसन्धानका क्रममा चुहाएका सूचनाभन्दा भिन्न रूपमा प्रतिवेदन आएपछि प्रहरीको भूमिकाप्रति पनि आशंका उत्पन्न भएको छ । शरणार्थी र सुन तस्करी दुवै प्रकरणमा प्रहरीले सरकारी वकिलको कार्यालयमा बुझाएका अनुसन्धान प्रतिवेदनमा भिआइपी आरोपीलाई चोख्याउन खोजेको आरोपसहित टीकाटिप्पणी भइरहेको छ । प्रहरीले भने दुवै प्रकरणमा अनुसन्धान अझैं पूर्ण नभएको जनाउँदै आफ्नो बचाउ गरिरहेको छ । यो सामाचार आजको नागरिक दैनिकमा छ ।
