काठमाडौँ, २५ भदौ । उपप्रधान एवं गृहमन्त्री नारायणकाजी श्रेष्ठले सद्भाव र सहिष्णुताको मौलिक विशेषतामा आक्रमण गर्ने प्रयास भइरहेको बताएका छन् ।
आज ललितपुरमा ज्यापु समाज यलले आयोजना गरेको कार्यक्रममा बोल्दै उनले जातीय एवं धार्मिक सद्भाव बिथोल्न द्वन्द्व पैदा गर्ने प्रयास भइरहेकोले सचेत हुनुपर्नेमा जोड दिए । नेपाली समाजको मौलिक परम्परा बिगार्न खोज्ने षड्यन्त्रलाई सफल हुन नदिने उनले बताए ।
राजनीतिक परिवर्तनसँगै आधारभूत आवश्यकता पूरा होस् भन्ने जनताको आकांक्षा रहेको भन्दै गृहमन्त्री श्रेष्ठले यसप्रति सरकार गम्भीर भएर काम गरिरहेको जिकिर गरे ।
