काठमाडौँ, १२ साउन । नेकपा (एमाले)का अध्यक्ष केपी शर्मा ओलीले प्रधानमन्त्री समेत रहेका नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ नेपाली कांग्रेसको काधँमा बसेको बताएका छन् ।
आज भक्तपुरमा आयोजित जनसंगठन समन्वय संयन्त्रको बैठकमा बोल्दै उनले कांग्रेसको दुर्गति यति चाँडै हुन्छ भन्ने नसोचेको बताए । उनले कांग्रेस माओवादीको ढाकर बोकेर हिँडेको भन्दै कटाक्ष गरे ।
उनले भने, “कांग्रेसको नसिबमा यति चाँडै यो दुर्गति । माओवादीको ढाकर बोक्या हेर त,” “अहिले कांग्रेसको दुईपट्टी टिलिक्क परेका जुत्ता लगाएका खुट्टा यतापट्टी झारेर प्रचण्ड कानमा समातेर हटहट गरेर हिड्याछन् । कांग्रेस लुरुलुरु । कांग्रेसको भाग्यमा थियो । अब कठैबरा भन्न सकिन्छ ।” उनले कांग्रेसले भ्रष्टाचारकै विरुद्ध बोल्नै नसक्ने आरोप लगाए ।
